Acts 3
Di maaloo aga taane mmade ono wae
1Dahi laangi hua, Peter mo John ne hula gi di Hale Daumaha, di laa e dolu i muli di oodee, i di aawaa hai dalodalo. 2Taane mmade ono wae mai i dono tomo aga damagiigi e lahalaha ia gi di ngudu di bontai di Hale Daumaha dela e haga ingoo bolo di “Bontai Madamada”, belee madamadau teenedi gi nia daangada ala ma ga ulu gi lodo di Hale Daumaha deelaa. 3Taane ga gidee Peter mo John e ulu gi lodo, gei mee ga madau ana bahihadu gi meemaa. 4Meemaa ga mmada ia gi mee, gei Peter ga helekai, “Mmada mai gi gimaua!” 5Taane deelaa ga huli adu gi meemaa, e haga maanadu bolo meemaa ga wanga nau bahihadu gi deia. 6Peter ga helekai gi mee, “Agu teenedi be agu goolo ai, gei au ga gowadu gi di goe di mee dela i dogu baahi. Au e helekai adu gi di goe i di ingoo o Jesus Christ o Nazareth: Duu i-nua, haele!” 7Malaa, Peter ga kumi di lima gau donu o taane, ga hagamaamaa aga a mee gi duu i-nua. Di madagoaa hua deelaa, gei nia wae mo ono dudaginga gu maaloo. 8Mee ga hobo gi nua, ga duu gi ono wae, ga daamada ga heehee, ga ulu adu madalia meemaa gi lodo di Hale Daumaha, e hobohobo haga hagaamu a God. 9Digau dogologowaahee gu gidee taane e heehee mo di haga hagaamu a God. 10Di madagoaa hua digaula ne modongoohia bolo ma go taane nogo noho taalinga di “Bontai Madamada” nogo madamadau teenedi, gei digaula huogodoo gu goboina huoloo di hai dela ne hai gi taane mmade ono wae deelaa.Di agoago Peter i lodo di Hale Daumaha
11I dono daudali Peter mo John, nia daangada huogodoo gu goboina huoloo, ga llele gi digaula i di gowaa dela e haga ingoo bolo di “Balanda Solomon”. 12Malaa, di madagoaa Peter ne gidee digaula, mee ga helekai, “Nia daangada Israel huogodoo! Goodou e aha ala e goboina huoloo nia mee aanei, ge dadaumada gimaadou? Goodou e hagamamaanadu bolo ma go gimaua ne hai taane deenei gi heehee, mai mau mogobuna mo mau humalia? 13Di God o Abraham, Isaac mo Jacob, di God o tadau maadua mmaadua ne wanga ono mogobuna madamada gi dana hege go Jesus. Gei goodou gu wanga a mee gi digau aamua, gu hagahuaidu a mee i mua o Pilate, maeaha maa mee bolo ia e hagamehede a mee. a 14Go mee dela e dabuaahia ge humalia, gei goodou gu haga de iloo a mee, ga tangi gi Pilate gi haga mehede ina taane daaligi dangada. b 15Goodou ne daaligi a mee dela e dagi nia daangada gi di haga mouli, gei God ne haga mouli aga a mee mai i di made. Gimaua ala go digau haga modongoohia nia mee aanei. 16Nia mogobuna o di ingoo o Jesus, aalaa ne hagamaaloo taane mmade ono wae deenei. Di mee dela gu mmada ginai goodou gei gu iloo, la ne hai mai i di hagadonu i di ingoo o Jesus. Di hagadonu Jesus dela ne hai a mee gi hili be di hai dela ne mmada ginai goodou huogodoo.17“Ogu duaahina nei, au gu iloo bolo nia mee ala ne hai go goodou mo godou dagi ang gi Jesus, la ne hai idimaa goodou e haga de iloo. 18Namua loo, God gu haga modongoohia i nnelekai soukohp bolo dana Mesaia le e hai loo gi hagaduadua, ge gu gila. 19Malaa, goodou huluhia godou manawa, huli hoou ang gi God, gi haga madammaa ina godou huaidu. Maa goodou ga hai beelaa, 20gei di madagoaa e hagamaaloo aga godou hagataalunga le e dugu mai baahi o Dimaadua. Gei mee ga hagau mai Jesus, di Mesaia, dela gu lawa di hilihili adu gi goodou. 21Mee e hai loo gi noho i di langi, ga dae loo gi di madagoaa dela ga haga hoou nia mee huogodoo, be di hai a God ne hagi ang gi ana soukohp haga madagu i mua. 22Idimaa, Moses gu helekai,
Dimaadua di godou God, ga hagau adu gi goodou soukohp, be dana hai ne hagau mai au. Soukohp le e hanimoi i godou baahi. Goodou e hai loo gi hagalongo gi nia mee huogodoo a maa ala ma ga aago adu gi goodou. c 23Maa tangada ga hagalee hagalongo gi soukohp deelaa , le e dugu gee gi daha mo nia daangada a God, e haga mmaa gi daha. d
24“Malaa nia soukohp huogodoo nogo kokohp mai mua, mo Samuel mono soukohp nomuli, gu hagadele nia mee huogodoo ala e hai i nia laangi aanei. 25Nia hagababa a God ala ne wanga gi nia soukohp, la aanei adu gi goodou, gei goodou e hai mee labelaa gi di hagababa a God ne hai gi godou maadua mmaadua. Be ana helekai gi Abraham boloo: Au ga haga maluagina nia daangada huogodoo i henuailala mai doo hagadili. e 26God gu hilihili dana dangada hai hegau, gu hagau mai i mua gi godou baahi, belee haga maluagina goodou, gi mee goodou di lawa gi daha mo godou haihai huaidu huogodoo.”
Copyright information for
KPG